XXIV.
VACAT SEDES.
1241. Mart. - 1243. 7. Jul.
Mathia Archiepiscopo in arena fatalis pugnae obtruncato, Bela rege fugato, tota Hungaria et urbe ipsa Strigoniensi funditus destructa, in hac summa rerum confusione Capitulum Strigon., licet in arce Strigon. ab excidio salvatum, novam electionem ex eo distulit, quia Regis a Duce Austriae primum nequiter detenti, tum ab insequentibus tartaris ad insulas Dalmaticas se recipientis, praevium de eligendo novo Archiepiscopo consensum, ut moris erat, (Vide Nrum. 455 ) obtinere non potuit. Stephanus quidem Vancsai, ut videbimus, iam a. 1242. Postulatus et Electus Archiepiscopus scribitur; quia tamen in diplomatibus regiis a. 1241. 23. Sept.[487]; tum 1243. 5. Jun.[488] exaratis, sedes Strigon. vacare dicitur; manifeste apparet, Stephanum hunc ante confirmationem suam, Archiepiscopatum non apprehendisse; adeoque vacantiam ad diem usque obtentae confirmationis, seu ad 7. Jul. 1243. extendimus.

---

[487] Wenzel 1. o. VII. 116.

[488] Fejér Cod. dipl. IV. I. 293. et XI. 406.