512.
1252. Oct. - Bela IV. ad preces Stephani Vanchai Archiepiscopi Strigon. et Cardinalis filios Marcelli de Modor, Jobagiones Szolgagyőrienses, ab Andrea II. Nobilitatis praerogativa condecoratos, in eadem libertate confirmat.
(B)ELA dei gracia Hungarie, Dalmacie, Crowacie, Rame, Seruie, Gallicie, Lodomerie, Cumanieque Rex, Vniuersis, presentes litteras inspecturis, salutem in omnium saluatore. Ad uniuersorum noticiam harum serie uolumus peruenire, quod venerabilis Pater Stephanus, archiepiscopus Strigon., per sedem apostolicam in Episcopum Prenestinum et Ecclesie Romane Cardynalem assumptus, nobis litteras nostras memoriales exhibuit, quod Marcellus de Modor, de Comitatu Camariensi, de iobagionibus Comitatus Zulugageuriensis existens, ab inclite memorie Domino Rege Andrea, Patre nostro, ob suorum seruiciorum merita optinuisset, quod a debito, in quo predicto Castro ipse et eius filij, uidelicet Benedictus, Marcellus et Elyas tenebantur, penitus essent exempti et inter seruientes Regis censerentur, et eadem in omnibus libertatis praerogatiua fruerentur; petens, quod cum sibi filij prefati Marcelli, multa seruicia, ac nobis impendissent, et Elyas, eiusdem Marcelli filius, ad Romanam Curiam intenderet cum ipso proficisci, Priuilegium Patris nostri, quod super libertate sua habentes, per incursus amiserant Thartharorum, renouare dignaremur. Nos igitur iustis eiusdem domini archiepiscopi precibus inclinatj, prefatam libertatem eis auctoritate presencium confirmamus, ut deinceps Castro de Zulugageur nullo seruicio seu debito sint astricti, sed seruientum nostrorum ipsi et eorum heredes perpetuis temporibus gaudeant libertate. Vt autem huius libertatis series irreuocabilis permaneat in posterum et inconcussa, presentes concessimus litteras, dupplicis sigilli nostri munimine roboratas. Datum Anno domini Millesimo Ducentesimo Quinquagesimo Secundo. Regni autem nostri anno decimo septimo.
Fragm. sigilli e rubro et flavo serico pendet. Orig. pulchre exaratum, in Arch. Cap. Strig. priv. Lad. 49. Fasc. 1. Nro. 4.. - Edidit Fejér 1. c. IV. II. pag. 138. - Cum 14. Oct. anni huius iam 18us regiminis annus incipiebat; diploma hoc ante diem hunc edi, sicque etiam Stephanus Archiepiscopus Strig. iam ante diem hunc in Cardinalem assumi debuit; quare ergo Stephanus ipse 20. adhuc Oct. se tantum Archiepiscopum Strigon. scribit? (Vide Nrum. 511.) Probabilius exaratum fuerit diploma hoc circa finem mensis huius; ac scriba in assignando regiminis anno aberrauerit.
513.
1252. ineunte Nov. - Stephanus Vanchai, Cardinalis Episcopus Praenestinus creatus, Archiepiscopatum Strigon. resignat.
Mense Novembris anni huius Stephano Vancsai, e Praelatis Hungariae omnium