Restitutis ecclesiis, castro et urbe suae Cathedrae Chanadinus inter curas caeteras pastorales modo animum vertit ad bona Archiepiscopalia vindicanda et ordinanda. Non minori cum sollertia et manu forti processit hic, quam alibi.
Ante omnia in hoc intendit, ut jura, privilegia et libertates Archiepiscopatus datis a Rege litteris de novo confirmarentur. Eruit diligenter et eruere fecit omnes possessiones Ecclesiae occupatas et usurpatas, etiam minimas, et movit processum revindicationis. Quandoque coram iudicibus in persona apparuit ad iura tuenda. Imo non raro factum est, ut ad recognoscendos seu perambulandos fines possessionum in persona exiret et accederet, ne quid defrimenti caperet Sedes Archiepiscopalis.
Genium extraordinarium et versatile monstravit Chanadinus etiam in dirigendis bonis Archiepiscopalibus. In eo enim erat, ut possessiones in majora dominia adunans et circumscribens majores complexus acciperet, qui iterum facilius administrarentur et proventus pinguiores ferrent. Ad hunc finem non resiliit commutationibus faciendis, quando bona occasio offerebatur. Sic contractu commutativo cum conventu de Zobor pacto acquisivit villam Kürt, eodem modo ab episcopo Nitriensi villas Perbete, Tardoskedd et Udvard. Ubi vero aliter ad finem pervenire non poterat, libenter per emptiones integra fecit et auxit bona minora.
In commutationibus vero libentissime decimas obtulit in vicem. Decimae enim proventus semper precabiles erant. Per multas pertransibant manus, et quando ad manus Archiepiscopi venerunt, iis, quae supererant, contentus esse debuit. Cujus rei sequela erat, ut decimas remanentes eo magis requireret et numeraret. Ipse fatetur in litteris fundationalibus capituli Sancti Georgii in Campo, quod decimae e comitatu Gömör, quae hucusque vix 60 florenos attingebant, sub ejus regimine ad 400 florenos sint elevatae. (Cf. nr. 421.)
Bona Archiepiscopalia praeterea novis praediis acquisitis auxit. Ita recuperavit, accuratius dicendo redemit a Rege Carolo 200 marcis possessionem Szerdahely, omnium praediorum margaritam. Summam vero acceptam Rex ad restaurandum castrum dirutum in Holics (Ujvár) impendit.
Bona Archiepiscopalia aucta sunt etiam donationibus piis, quae Chanadini tempore percrebrae erant. Ipse enim pastorali sua sollertia animos multorum placabiles et religioni addictos fecit, ut zelus antiquus redivivus videretur in donis piis. Hac via acquisivit Archiepiscopatus a domina Csene, filia Majos de Berencs possessiones Család, Billeg, Páskfüze et Bácsaföld in Comitatu Barsiensi; similiter a vidua Jacobi, filii Ranoldi villam Ekel. Imo etiam comes Thomas, vojvoda Transilvaniensis, vir quondam ferocia et praepotentia famosus, non cunctatus est pium animi zelum demonstrare in Sanctum Adalbertum donando Archiepiscopo villam Kürt in comitatu Barsiensi sitam. Ludovicus Rex I. vero in memoriam coronationis suae gloriosae praediis Barth et Ölyved auxit bona Archiepiscopalia.
Non solum autem in ordinanda propria oeconomia, verum etiam in ordinandis negotiis Regni indefessus erat Chanadinus noster. Multum temporis trivit in Curia Regis influxum personalem semper adhibendo, in quantum possibile erat, ad emolumentum Regni et Ecclesiae. Rex Carolus, qui illum patrinum carissimum nominat – quia Principem Stephanum e sacro fonte levavit, – multoties consilium et auxilium eius expetivit. Regina vero Elisabetha non semel in negotiis delicatis, quae illi quam maxime eordi erant, patrocinium eius exorabat. Providentia divina factum est, ut vir tantae energiae, tantae prudentiae, tam delicati sensus diplomatici tunc temporis Domui Regiae adstaret. Difficultates

---