565.
1303. 24. Jun. - Cruciferi Strigon. vineam Budensem Petri physici et apothecarii pro annuo fertone a solutione decimarum eximunt.
Frater Nicolaus, magister Domus Hospitalis ecclesie sancti Regis, frater Dominicus custos eiusdem ecclesie, frater Georgius prior de Calidis aquis[523] Ceterique fratres eiusdem ecclesie sancti Regis Stephani de Strigonio, Vniuersis, presentes litteras inspecturis, Salutem in domino sempiternam. Ad uniuersorum noticiam, tam presencium, quam futurorum, harum serie volumus peruenire, Quod nos considerantes seruiciorum merita magistri Petri fisicij (sic) et apotecarij, Ciuis Castri Budensis, que nobis et nostris fratribus exhibuit incessanter, volentes sibi aliqua vicissitudine occurrere, talem graciam duximus faciendum, quod idem magister Petrus et heredes sui de vinea sua, in territorio kuesdmal existenti, cuius quidem vinee duas partes a nostris condicionarijs, videlicet ab andrea filio alexij et Mychaele filio eiusdem alexij, de nostro consensu perpetrato et terciam partem a magistro alexio sartore, Ciui de suburbio Castri Budensis, ac domina Elysabeth, uxore eiusdem, empticio (sic) comparauit et de precio eiusdem vinee ijdem condicionarij aliam vineam, nobis similem et equiualentem pro debitis seruicijs eorumdem, compararunt et quia eciam de eadem vinea numquam aliqua decima per eosdem condicionarios fuit persoluta, nec eadem vinea alicui decimacioni fuit et est subiecta; idcirco idem magister Petrus fisicus et apotecarius, Ciuis Castri Budensis, ac heredes ipsius, heredumque suorum successores nullam decimam nobis, uel decimatoribus nostris ullo umquam tempore soluere teneantur, nisi vnum fertonem fini argenti pro predictis decimis monasterio nostro, ecclesie sancti Regis, annis singulis, in ipso festo sancti Regis, idem magister Petrus et sui heredes soluere teneantur; ita, quod ipsa vinea in perpetuum ab solucione decimarum libera sit semper et exempta, absque fertone fini argenti supradicto. In cuius rei memoriam et perpetuam firmitatem presentes concessimus, sigilli nostri munimine roboratas. Datum In festo Natiuitatis beati Johannis baptiste. Anno domini Millesimo Trecentesimo Tercio.
Duo sigilla e viridi et tertium e rubro serico dependent. Primum rotundum, Cruciferum stantem, dextra crucem dupplicatam tenentem exhibet cum inscriptione: + Sigil. Magistri. Hospital. s. Regis de Strigon. Secundum est Conventus Strigon. et tertium Budensis. - Orig. pulchre exaratum in Arch. Cap. Scepus publ. Scrin. 9. fasc. 3. Nr. 15.

---

[523] Nempe de Budensi Conventu