268.
1331. (Esztergom.) 7. Mart. – Conventus Cruciferorum Strigon., nobilem Mike terram Bel, archiepiscopatui Strigon. donasse, testatur.
Conventus cruciferorum domus hospitalis ecclesie sancti regis Stephani de Strigonio, omnibus Christi fidelibus, presentem paginam inspecturis, salutem in omnium Salvatore. Rerum omnium iusto deliheracionis humane mentis acumine dispositarum, firmamentum a posterorum recordacione evanesceret, nisi sagax discretorum providencia scripture remedio nebulose oblivionis caliginem suffocando, supervivencium noticie geste rei veritatem lucidaret. Proinde, ad universorum noticiam, tam presencium quam futurorum, harum serie volumus pervenire: quod Myke, filius Symonis, nobilis de Beel, frater Johannis, filii Apsa, in nostri presencia personaliter astando, dixit et confessus est, oraculo vive vocis: quod terram Beel predictam, scilicet porcionem predicti Johannis fratris sui et ipsius, in vicinitate et commetaneitate, ex omni parte, terre seu possessionis ecclesie sancti Adalberti de Strigonio, Sorlow vocate, in comitatu Borsiensi existentem, cum omnibus suis utilitatibus et pertinenciis universis, ob remedium animarum parentum suorum et ipsius Johannis iam defuncti, necnon pro salute sua dedisse et coram nobis dedit, donavit, statuit et assignavit predicte ecclesie sancti Adalberti, iure perpetuo et irrevocabiliter possidendam, tenendam pariter et habendam; prout eciam dictus Johannes, adhuc vivens, dictam terram totalem dicte ecclesie donare commisisset perpetuo. Ita tamen, quod dominus archyepiscopus, seu prelatus ecclesie sancti Adalberti, quicunque fuerit, ipsum Myke, prout decet, de bonis dicte ecclesie usque suam vitam tenebit et conservabit. In cuius rei memoriam, perpetuamque firmitatem, ad instanciam parcium predictarum, presentes concessimus litteras privilegiales, pendentis sigilli nostri munimine roboratas et alfabeto intercisas. Datum, feria quinta proxima post Dominicam Oculi mei, anno Domini M-o CCC-o XXX-o primo.
A. B. C.
Sigillum e rubro serico pendebat. – Orig. membr., in Arch. Cap. Strigon. Publ. Capsa 14. fasc. 6. nr. 15.
269.
1331. – 16. Mart. – Comitatus Simigiensis, tres particulas possessionum Tyukos, ad Andream et alios nobiles, hereditario jure pertinere, reginae rescribit.
Tenorem vide sub nr. 289.
270.
1331. (Somogyvár.) 20. Mart. – Conventus Simigiensis, quoad possessiones Tyukos, idem ac comitatus sub nr. 269., perhibet.
Seriem vide sub nr. 289.
Első
