I.
BOLESLAUS, DUX TOSTENSIS, ARCHIELECTUS.
1321. cir. Febr. – 1321. 1. Oct.

1.
1321. Nagyvárad. 19. Maii. – Ivánka, episcopus Varadiensis, transsumit literas Thomae, quondam archiepiscopi Strigoniensis, Petro plebano de Szőllős et Ugocsa concessas, ac Boleslao electo archiepiscopo Strigoniensi, confirmandas submittit.
Venerabili in Christo patri domino B.[olezlao], Dei gracia Strigoniensis ecclesie archielecto, eiusdemque loci comiti perpetuo, amico suo reverentissimo Johanca, divina miseracione episcopus Waradiensis, reverencia prompta et parata cum sincera et mutua in Domino caritate. Vir discretus et honestus magister Petrus, filius Stephani filii Mychaelis proximi nostri, plebanus ecclesie Beate Virginis de Zeuleus et de Vgacha, a nobis instantissime postulavit, ut quia propter viarum discrimina, litteras venerabilis patris Thome, quondam archiepiscopi Strigoniensis, predecessoris vestri, super plebanie sue collacione confectas, veretur seu formidat vestre paternitati transmittere, tenorem earumdem amicicie vestre transcribi sub nostro sigillo faceremus, ad cautelam et maiorem certitudinem. Quarum tenor talis est:
Sequuntur litt. Thomae, archieppi Strig., de dato 1313. 13. Aug. Budae extrodatae, et in Mon. Eccl. Strig. T. II. sub num. 773. p. 686 editae.[17]
Nos igitur peticionem dicti Petri plebani fore iustam attendentes, formam predictarum litterarum, cum pendenti sigillo consignatarum, non abrasam, nec in aliqua sui parte viciatam, de verbo ad verbum sub nostro sigillo vestre transscribi fecimus paternitati; rogantes et requirentes intime amiciciam vestram, quatenus predictas litteras benigne acceptantes, optentu peticionis nostre, mediantibus vestris litteris, vestroque sigillo dignemini paternaliter confirmare, ne vestris in temporibus iura ecclesiastica in talibus et in aliis consimilibus, persuasiones et instigaciones malivolorum robore carencia, valeant deprimi seu conculcari, sed magis incrementa virtutum queant adipisci. Datum Waradini, feria tercia proxima ante festum sancte Elene regine, anno Domini M CCC XX. primo.
Extus: Venerabili in Christo patri, domino B.[olezlao], Dei gracia Strigoniensis ecclesie archielecto, locique eiusdem comiti perpetuo, amico suo reverendo.
Sigillum margini exteriori fuit appressum. – Origin. membran. in Arch. Primat. Secul. Lad. D. nr. 99. – Edit. Magyar Tört. Tár. VI. p. 185.

[17] 1313.13.Aug.