797.
1315. 28. Jan. - Capitulum Poson. Marcum Fodor de Vök sextam partem molendini quindecim talentis magistro Leopoldo notario Comitis Poson. vendidisse testatur.
A. B. C.
Vniuersis xpi. fidelibus, presentes litteras inspecturis, Capitulum ecclesie Poson. Salutem in domino sempiternam, ad uniuersorum noticiam tenore presencium volumus peruenire, Quod constitutus personaliter coram nobis Markus Fodor de Wilk, confessus est oraculo uiue uocis, quod ipse sextam partem cuiusdam molendini, super fluuuium Humuro existentis, ipsum de iure contingentem, cum permissione et bona uoluntate domine Agnetis, consortis sue et omnium cognatorum, ac vicinorum suorum, sicut per discretum virum Petrum, plebanum de sancta Cruce, quem loco et uice nostri ad inquirendum dictam dominam, cognatos et vicinos direxeramus, fuimus plenius informati, discreto viro et honesto, magistro Leupoldo, notario comitis Poson., qui presencialiter aderat, pro quindecim talentis denariorum Wiennensium, plene ab eodem receptis, uendidisset, dedisset et tradidisset, iure perpetuo in filios filiorum possidendam, habendam et tenendam. Obligando se, quod quicunque processu temporum eundem magistrum Leupoldum, aut suos heredes, heredumque suorum successores racione dicte sexte partis molendini uellent forsitan molestare; extunc idem Markus, domina uxor sua et cognati, aut successores eorumdem tenerentur expedire proprijs laboribus et expensis. In cuius rei testimonium presentes concessimus litteras, sigilli nostri munimine roboratas. Datum feria tercia proxima post festum beati Pauli apostoli conuersionis, Anno domini M°. C°C°C°. quindecimo.
Sigillum integrum e rubro, viridi et flavo serico pendet. Orig. in Arch. Cap. Poson. publ. Capsa 14. fasc. 8. Nr. 10. Aliud par cum Alphabeto inferius notatum, sed nimis lacerum, ibidem sub eodem Nr.
798.
1315. 22. Febr. - Thomas Archiepiscopus debitum ecclesiae b. Mariae Magd. Strigon. Custodiae Strigon. solvendum, in annuis decem pensis definitum esse testatur.
Nos Thomas, miseracione diuina Strigon. Archiepiscopus, locique eiusdem Comes perpetuus, memorie commendantes, significamus, quibus expedit, tenore presencium vniuersis, Quod discreti uiri, Petrus prepositus ecclesie sancti Georgij de Strigonio et Michael Archydiaconus Kamariniensis, socij et Canonici ecclesie nostre karissimi, inter magistrum Blasium, ecclesie nostre Custodem