825.
1316. - Joannes PP. XXII. Thomam Archiepiscopum Strigon. hortatur, ut bona Abbatiae s. Benedicti de Gron auctoritate sua revindicet.
Schmitth AEppi. Strigon. 166. - Fejér Cod. dipl. VIII. I. 599. Sed literae hae in Arch. Cap. Strig. non adsunt.
826.
1317. 18. Jan. - Capitulum Poson. Jacobum de Hideghet dimidietatem possessionis suae Joanni consanguineo suo triginta marcis vendidisse testatur.
Vniuersis xpi. fidelibus, presentes litteras inspecturis, Capitulum ecclesie Poson. salutem in salutis largitore. Ad vniuersorum noticiam tenore presencium volumus peruenire, Quod constitutus personaliter coram nobis Jacobus, filius Georgij de villa Hydegkeet, ab vna parte; Johannes, filius Locur de eadem, ab altera; idem Jacobus est confessus oraculo viue uocis, quod ipse dimidietatem tocius Possessionis sue, quam inter terras dicte ville Hidegheet hereditarie habere dinoscitur, cum suis utilitatibus et pertinencijs eidem Johanni, proximo consanguineo suo et per eum suis heredibus, heredumque suorum successoribus, pro triginta marcis denariorum, plene ab eodem habitis et receptis, cum permissione et bona uoluntate omnium cognatorum et generacionum suarum, videlicet Mathey, Folkus, Fylteu, Pauli, Gregorij et Jacobi, ac Sebastiani, qui presencialiter aderant; residuam uero partem dicte possessionis sue, similiter cum suis utilitatibus et pertinencijs, racione indissolubilis proximitatis eiusdem, post mortem suam dedisset, donasset et tradidisset, iure perpetuo possidendas, habendas et tenendas; Ita tamen, quod de secunda parte dicte possessionis, que post mortem suam ad manus predicti Johannis deuoluetur, tenebitur dotem vxoris sue, iuxta consuetudinem Regni finaliter expedire. In cuius rei testimonium presentes concessimus litteras, sigilli nostri munimine roboratas. Datum in festo beate prisce virginis, Anno domini M°. C°C°C°. Decimo Septimo.
A. B. C.
Sigillum e zona membr. pendebat. Orig. in Arch. Cap. Poson. publ. Capsa 14. fasc. 8. Nr. 4.

---