863.
1318. 5. Dec. - Magistratus Budensis Benedictum Civem Petro Chinch civi vineam suam quadraginta marcis vendidisse testatur.
Nos Comes Johannes Rector Castri noui montis pestiensis, Benus, kunclinus filius Herclel, Bartholomeus, albertus, kunclinus de Megerdorf, Wolueng, vlmannus, Nicolaus, Lohrer, Petermanus, tylmanus, Nicolaus de Agria, et Nicolaus filius Myko, tunc pro tempore Jurati ipsius Castri, Memorie commendantes, significamus vniuersis, quibus expedit, presencium per tenorem, Quod Benedictus filius Beek, conciuis noster, coram nobis personaliter constitutus, vineam suam Cum terra inculta, sitam in territorio Veteris Bude, in vicinitate vinearum Capituli loci eiusdem, ab vna parte, et Benedicti predicti ex altera iacentem, de consensu et presenciali permissione vxoris sue, puerorum et omnium cognatorum suorum, nullo contradictore existente, vendidit et tradidit Petro, dicto Chinch, conciui nostro et per eum suis heredibus, heredumque suorum successoribus, Jure perpetuo et irreuocabiliter, ac pacifice possidendam, pro quadraginta marcis argenti mercimonialis, plene receptis ab eodem. Assumpsit nichilominus Benedictus prefatus, eundem petrum, suosque heredes secundum vsum et consuetudinem nostre Ciuitatis, ab antiquo approbatam, proprijs laboribus et expensis expedire ab omnibus, racione prenotate vinee et suarum vtilitatum volentibus molestare. In cuius rei memoriam, perpetuamque firmitatem, ad instanciam et peticionem parcium, presentes concessimus Litteras, dupplicis sigilli nostri munimine Roboratas. Datum in vigilia Beati Nicolai confessoris, anno domini Millesimo Trecentesimo decimo octauo.
Fragmen sigilli in aversa parte turrem, in reversa autem fasces Hungariae exhibens, e rubro et flavo serico pendet. Orig. in Arch. Cap. Scepus. publ. Scrin. 9. fasc. 13. Nr. 25.
864.
1318. - Herbordus et Leopoldus "vnacum filijs, Amicis, consanguineis et Affinibus nostris, quorum numerum et copiosam multitudinem ... singuli nobis et nostre eleccioni consencientes, singulariter exprimantur, ne legentibus, ... audientibus fastidium generetur," eligunt "Petrum Strigoniensis, posoniensisque Ecclesiarum canonicum, nobis et Ecclesie nostre in pastorali officio" parochum. Datum et actum in Tyrna.
Magyar Sion. VI. 459.

---