Clemens, episcopus servus servorum Dei, dilecto filio Guidoni, tituli sancte Cecilie presbitero cardinali, apostolice sedis legato, salutem et apostolicam benediccionem. Cum nos te ad regnum Vngarie et Lombardie et nonnullas alias partes, in litteris nostris tibi super tua legacione concessis specialiter nominatas, cum plene legacionis officio destinemus, ut in commissis tibi negociis eo possis prosperari felicius, quo maiori per nos fueris auctoritate munitis (sic!), discrecioni tue compellendi auctoritate nostra, per te vel alium, seu alios prelatos cuiuscunque preheminencie vel dignitatis extiterint, nec non personas quascunque tam Cisterciensis, Premonstratensis, Cluniacensis et aliorum ordinum magistros, quoque priores, perceptores et fratres hospitalis sancti Johannis Iherososolimitani et quorumcunque aliorum hospitalium seu domorum, quam alias personas ecclesiasticas, cathedralium et aliarum ecclesiarum, sive monasteriorum exemptorum et non exemptorum, per censuram ecclesiasticam, ad providendum in necessariis nunciis tuis, quos pro dictis tibi commissis negociis destinabis, non obstantibus quibuscunque privilegiis et indulgenciis apostolicis, per que possent in hac parte quomodolibet se tueri et de quibus quorumque totis tenoribus de verbo ad verbum in nostris litteris debeat fieri mencio specialis, plenam tenore presencium concedimus facultatem. Volumus tamen, quod ad vitandum ecclesiarum gravamina, parce utaris huiusmodi facultate. Datum Auinione, II kalendas Decembris[734], pontificatus nostri anno septimo.
Cumque pro exequendis negociis supradictis venerabilem in Christo patrem dominum Ildebrandinum, episcopum Paduanum socium, et cum eo magistros Nicolaum, sacre theologie professorem, ac Lodouicum canonicum Laudunensem, cappellanos nostros commensales, ad serenissimum principem dominum Lodouicum regem Vngarie illustrem et prefatum regnum et certas alias partes presencialiter destinemus, vos et vestrum quemlibet auctoritate apostolica, qua fungimur in hac parte, presencium tenore requirimus et monemus, vobisque nichilominus in virtute sancte obediencie, sub excommunicacionis pena mandamus, quatenus prefato episcopo, cum ipsum per partes et loca vestra transire contingerit, vel eciam declinare, benigne recipientes et honeste tractantes eidem de duodecim florenis auri, pro qualibet die, quos pro expensis suis necessariis et sue familie deliberacione prehabita taxammus, et securo conductu velitis libere providere. Committentes sibi eadem auctoritate, quatenus vos et singulos vestrum, ad solvendum dictos duodecim florenos auri, pro die qualibet, in totum vel in partem, nec non ad contribuendum cum aliis in prefata solucione, prout sibi videbitur, per censuram ecclesiasticam et quecunque alia remedia valeat compellere et eciam choartare. Nos enim sentencias quas occasione predicta tulerit in rebelles, ratas et gratas habebimus et faciemus auctore Domino inviolabiliter observari. In quorum omnium testimonium presentes litteras scribi mandavimus et sigilli nostri impressione muniri. Datum Strigonii, anno Domini millesimo trecentesimo quadragesimo nono, indiccione secunda, die lune XXVIII mensis Septembris.
Sigillum in fine texti cerae rubrae impressum est, in charta sigill. tegenti legitur: Chanad. Chanadynus. – Orig. chart., in Arch. Primat. Arch. Eccl. Vet, nr. 27/3.

[734] 1348. 30. Nov.