PRAEFATIO.
Monumentorum Ecclesiae Strigoniensis Tomus III. in anniversario quinquagesimo duplicis amplissimi aeque ac faustissimi eventus in lucem prodit.
Quinquaginta abhinc anni defluxerunt, ex quo b. m. Joannis Cardinalis Simor, Principis, quondam Hungariae Primatis, iussu item et notissima omnibus munificentia primum ingentis operis volumen publicatum est. Favor Pastoris infulati in scientias singularis et summa eruditio b. m. Ferdinandi Knauz die Resurrectionis Domini a. 1874. immanem diplomatum molem ex crasso pulvere saeculorum efferebant, ut fierent facundi testes gloriae Ecclesiae Strigoniensis vetustissimae, simul et lapides aedificii magni et fastuosi Historiae Regni Hungariae.
Et itidem quinquaginta anni defluxerunt ex tempore, quo benigna dispositione Pastorali et iussu b. m. Joannis Simor presbyter Sanctae Ecclesiae factus est Joannes Csernoch. Die 18. mensis Novembris a. 1874. episcopus auxiliaris Vindobonensis, Josephus Kutschker, successor futurus Card. Rauscher, imposuit illi manus et sub altis ac magnificis fornicibus ecclesiae Sancti Stephani sacerdotem archidioecesis Strigoniensis ordinavit.
Neopresbyter die 19. Nov. a. 1874. festo s. Elisabeth Hungariae in ecclesia filiarum s. Elisabeth primam hostiam omnipotenti Deo mactavit, qua occasione sollemni partem manuductoris Antonias Sujánszky, canonicus Strigoniensis, Collegii Pazmaniani tunc rector, egit; sermonem sacrum vero P. Anselmus Rickert O. S. B., in universitate Vindob. professor, ad fideles instituit.
Duo haec Jubilaea duplicia nobis parant gaudia et duplicia imponunt officia.
Imprimis dilectissimo, qui 42 annis post gestu liberali Monumenta nostra iterum resurgere fecit, Pastori et Pontifici, uberrimas agere gratias debemus. Sane editio vasti, quale hoc est, operis et eiusdem in historiographorum mensa depositio in consolidato foecundoque rerum ordine quoque pro amplo ac pio erga Patriam munere habebatur; eo magis hodie, cum immensos editionis sumptus ex paucis tantum diminutorum bonorum archiepiscopalium reditibus solvendos esse intelligimus, hic mirae liberalitatis gestus a nobis mirandus reputatur.
In maximis quoque rebus quidam gradus distingui possunt. Ita, si Joannes Cardinalis Simor per inchoanda perque divulganda duo Monumentorum volumina permagnum certe opus egerit, haud arguendi nos iactantiae sumus, cum Joannem Cardinalem Csernoch, celeberrimum celeberrimi magistri discipulum, per continuationem operis et editionem huius tertii voluminis plus adhuc praestitisse dicamus.
Joannes Card. Csernoch etenim est discipulus et carissimus filius Cardinalis Simor, servans fideliter depositas traditiones patris. Studiis altioribus qua Collegii Pazmaniani alumnus in Universitate Vindobonensi, postea in Instituto S. Augustini

---