289.
1331. – 3. Aug. – Elisabetha regina, e literis conventus Simigien. et comitatus Simig. eatenus informata, tres particulas possessionum Tyukos, Andreae de Fehéregyház et cognatis suis, remittit.
Elysabeth, Dei gracia regina Hungarie, omnibus Christi fidelibus, tam presentibus quam futuris, presens scriptum intuentibus, salutem in largitore salutis. Reginalem decet excellenciam, suorum fidelium preces legitimas favorabiliter exaudire et eorum querimoniis, ac iustis peticionibus recensitis, ad conservanda ipsorum iura, facilem prebere consensum et hys presertim, que rite videntur suorum subditorum commodis convenire. Proinde ad universorum noticiam harum serie volumus pervenire: quod Andreas, filius Pauli de Feyreghaz suo, et eiusdem Pauli patris sui, ac Georgii fratris sui nomine, et Michael, filius Johannis dicti Zeuke, pro se et pro Petro fratre suo, ac Guege, filius Teodory, pro se similiter et pro Petro fratre suo, ad nostre maiestatis accedentes presenciam, verbis querelosis nobis intimare curarunt: quod tres particule possessionum Tyukus vocatarum, in comitatu Symigyensi, licet diversis metis distincte, tamen in una continuacione existentes, ipsorum essent et fuissent hereditarie, et nunc per nostros officiales, nomine possessionum nostrarum reginalium, forent impedite. Verum, quia super facto ipsarum particularium possessionum, si ad nostram spectent excellenciam, vel ad nobiles prenotatos, nobis veritas non constabat, fidelibus nostris conventui monasterii sancti Egydii de Somugwar, et iudicibus nobilium, ac universis nobilibus eiusdem comitatus, nostris litteris dedimus in mandatis, ut idem conventus unum ex ipsis pro testimonio transmitterent fidedignum, quo presente Petrus de Kyuskomard, vel Johannes, filius Gregorii, de Horuathkuth, altero absente homo noster, facta diligenti inquisicione, ab omnibus hominibus sciret et inquireret omnimodam veritatem, utrum predicte particule possessionum ad reginalem excellenciam, aut ad predictos nobiles de iure pertinuerint; et modo simili prefati iudices nobilium, necnon ceteri nobiles eiusdem comitatus Symigyensis, scita huius rei veritate super facto predictarum possessionum, iuxta fidem et fidelitatem ipsorum, nobis rescriberent veritatem. Qui quidem fideles nostri, conventus scilicet Symigyensis, nobis rescripserunt in hec verba:
Excellentissime domine eorum Elysabet, Dei gracia regine Hungarie, conventus monasterii sancti Egydii de Symigio, oraciones in Domino assiduas, debitas et devotas. Litteras vestre excellencie noveritis recepisse in hec verba:
Elysabeth, Dei gracia regina Hungarie, fidelibus suis conventui monasterii de Somugwar, salutem et graciam. Ex conquestione Andree, filii Pauli; Michaelis filii Johannis dicti Zeuke; item Guege et aliorum filiorum Teodory, datur nobis intelligere, quod tres particule possessionum Tyukus vocatarum, in comitatu Symigyensi in una continuacione, sed diversis metis separate existentes, que nunc nomine possessionum ad nos pertinencium sunt impedite, ipsorum essent hereditarie et ad ipsos iure hereditario pertinuissent ab antiquo, cuius memoria non extaret. Quam ob rem fidelitati vestre precipientes damus firmiter in mandatis, quatenus unum ex vobis trasmittatis fidedignum, coram quo Petrus de Kyuskomard, vel Johannes filius Gregorii de Horuathkuth, altero absente homo noster, accedendo ad partes illas, facta diligenti inquisicione ab omnibus quibus decebit, sciat et inquirat omnimodam veritatem, utrum predicte particule possessionum