12.
1321, Esztergom. 6. Octob. – Conventus Cruciferorum Strigon., possessionem Csév, per comitem Mikócsa, archiepiscopo et capitulo Strigon , quinquaginta marcis venditam esse perhibet.
Frater Jacobus, magister cruciferorum domus hospitalis sancti regis Stephani de Strigonio, totusque conventus eiusdem, omnibus Christi fidelibus, presentem paginam inspecturis, tam presentibus, quam futuris, salutem in eo, qui est omnium vera salus. Ad universorum noticiam, tenore presencium volumus pervenire, quod nobilis vir comes Mykocha, filius Elek, de genere Rosd, ab una parte coram nobis constitutus, et discretus vir, magister Johannes, Strigoniensis ecclesie canonicus et decanus, et in Agriensi ecclesia archidiaconus de Patha, vice et nomine domini Bolezlai, venerabilis in Christo patris, Dei gracia archiepiscopi Strigoniensi, ac honorabilium virorum, dominorum prepositi et capituli eiusdem Strigoniensis ecclesie, similiter coram nobis constitutus ex altera; idem comes Mikocha dixit, quamdam suam possessionem hereditariam, Chewy vocatam, in comitatu Strigoniensi existentem, vendidisse et tradidisse ipsis domino B.[olezlao] archiepiscopo, et per consequens archiepiscopatui et suo capitulo Strigoniensi, cum omnibus suis utilitatibus et pertinenciis, pratis, nemoribus et aliis, quocunque nomine censeantur, pro quinquaginta marcis, plene receptis et integraliter perceptis ab eisdem; volens eciam per hoc, idem comes Mykocha, ipsis preposito et capitulo Strigoniensi satisfacere de morte cuiusdam iobagionis eorum, quondam Johannis, filii Oroch, de villa eorum Keztheuchl (sic!), sicut dixit, per ipsum sine culpa interfecti et interempti. Cui quidem possessioni Chewy, a parte septemtrionali vicinatur villa Chabya, a parte vero occidentali possessio religiosorum virorum hospitalariorum sancti Johannis Jerosolimitanum, a parte orientali possessio similiter religiosorum virorum abbatis et fratrum suorum de Pilys, ordinis Cisterciensis, a parte vero meridionali similiter possessio eorumdem hospitalariorum beati Johannis contiguatur et pariter vicinatur. Assumpsit eciam idem comes Mykocha, ipsos archiepiscopum et suum Strigoniense capitulum a quibuslibet, racione predicte terre impetere, seu molestare volentibus, eoram quovis iudice defensare et tueri, propriis laboribus et expensis; renuncians idem comes Mykocha omni proprietati et iuri, quod habuit in terra Chawy (sic!) memorata. In cuius rei memoriam, perpetuamque firmitatem, presentes eisdem concessimus, sigilli nostri munimine roboratas. Datum, apud sanctum regem de Strigonio, in octavis beati Mykaelis Archangeli, anno Domini M-o CCC-o vicesimo.
Sigillum integrum e violaceo serico pendet. – Orig. membr. in Areh. Cap. Strig. Priv. Lad. 26. fasc. 2. nr. 9. – Datum 1320 erronee est appositum, quia Boleslaus anno 1320 archiepiscopus Styigon. vocari nequit, cum tamen anno 1321 eligitur et 1321 2. Oct. praeficitur in archieppm Strigoniensem. – Edid. Fejér: Cod. Dipl. VIII/2. p. 269 similiter ad a. 1320.

13.
1321. Avignon. 5. Dec. – Joannes PP. XXII., Boleslao archiepiscopo Strigon., cum per Berengarium episcopum Portuensem fecerit ei munus consecrationis impendi, mandat, ut ad ecclesiam suam Strigoniensem se conferre procuret.
Edid. Theiner: Monumenta Hist. Hung. I. p. 474.