templum. D. Martino sacrum, e quadrato lapide posuit.” - His in contrarium Bärnkopf (Praepos. Poson. pag. 12. §. 19.) Praepositurae huius fundatae laudem ad ducem Moravorum Zventibaldum (870 - 894.) pertinere coniectat. Caeterum quaestio haec direpto per Bohemos a. 1271. Capituli tabulario, non amplius definiri potest.
35.
1100. - Colomannus Rex „denarios, qui per universas Ungariae partes colliguntur,” a singulis comitibus „nominatim sub certo scribentes numero Strigonium usque festum s. Michaelis” mittendos decernit.
Decr. I. Col. cap. 79. - Erat nempe Strigonium, Buda nova nondum tunc erecta, locus opportunissimus, ad quem ex omni parte regni huiusmodi pecuniae comportari facile potuerint. Katona Hist. Crit. III. 118.
36.
1100. - Albricus iubente Seraphino Archiepiscopo Strigon. Decretorum Colomanni Regis libros conscribit, eique dedicat.
Praefatio ad Seraphin Archi Praesulem Strigon. - Dei gratia Seraphin Archi Praesuli divinarum igne virtutum ardenti, Albricus quamvis unus ex minimis tamen servus sanctitatis nuncupatus, in palatio coelestis contemplationis. - - Num specialis gratiae inspiratio mentem tuam coelestis sapientiae thesauro ditaverit et quam plurimis disertis ad didascalici meriti lucidas contubernii tui officinas quasi totidem gemmis ornaverit; haud parum ingenioli mei reformidat rusticitas, dum me, ut ita dicam elinguem - - iubes o Praesul Regalium instituta collationum recolere, vel senatoria totius Regni decreta, ieiuna oratione recapitulare. - - - - - Verumtamen tui Domine, qui in huius populi linguae genere minus me promptum consideras, si quid calamus a suscepti itineris tramite declinaverit, tua quaeso in me benevolentia solita et supervacua reseces et imperfecta suppleas, errata corrigas, commode dicta paterna gratia provehas et antequam in aures prodeant publicas, curae tuae digitum dignanter imponas, et quae tuo dumtaxat doctissimo digna constitui examine, tuo etiam iudicio a detrahentium muniantur livore.
Corp. Jur. Hung. Decr. I. Colom. - Péterffy Conc. I. 41. - Katona Hist. Crit. III. 63. - Albricum hunc Horányi (Memoria Hung. I. 20.) Canonicum Strigon.; Batthyányi (Leg. Eccl. I. 450) monachum Cassinensem; Katona autem (Hist. Crit. III. 63) Seraphino Archiepiscopo „a sacris domesticis ministrum” faciunt; quidpiam certi hac in re statui non potest.
Első
