238.
1221. 11. Mart. - Honorius PP. III. causam inter Conventum de Grón et Archiepiscopum Strigon, terminari aut sibi submitti demandat.
Honorius episcopus seruus seruorum dej, Dilectis filijs ... Preposito Geuriensi, ... Archidiacono Vesprimiensi et ... Custodi Albensi, Vesprimiensis diocesis, Salutem et apostolicam benedictionem. Dilectj filij ... Abbas et Conuentus sancti benedicti de Grana transmissa nobis petitione monstrarunt, quod venerabilis frater noster ... Strigoniensis Archiepiscopus tam per se, quam per officiales suos super quibusdam predijs animalibus et rebus alijs, ad eorum Monasterium de iure spectantibus, dampna eis grauia, et iniurias multiplices irrogauit, nec umquam ab eo potuerunt exinde satisfactionem aliquam obtinere, licet id pluries humiliter postularint. Cumque dilecto filio magistro Accontio Subdiacono et Capellano nostro, de mandato nostro in illis partibus existente, in eum, tamquam in arbitrum fuisset ab utraque parte super premissis concorditer compromissum, quia interim eodem Archiepiscopo ad curiam Carissimi in xpo. filij nostrj ... Illustris Regis Vngarie accedente, predictus abbas pro dilecto filio nobili uiro ... Duce Polonie in Poloniam de ipsius Regis mandato perrexit, nondum de prefato Archiepiscopo super hijs potuerunt iusticiam obtinere, propter quod memoratus abbas ad sedem apostolicam personaliter uenire coactus, nobis humiliter supplicauit, ut cum propter eiusdem Archiepiscopi potenciam in partibus Vngarie de ipso iustitiam habere non possit, eis super hoc prouidere misericorditer dignaremur. Quia uero nobis non constitit de premissis, discrecionj uestre per apostolica scripta mandamus, quatinus partibus conuocatis, audiatis causam et si de parcium processerit uoluntate, appellacione remota fine debito terminetis, facientes quod statueritis, auctoritate nostra firmiter obseruari. Alioquin ipsam ad nos remittatis sufficienter instructam, prefigentes partibus terminum competentem, quo per se uel responsales idoneos nostro se conspectuj representent, iustam auctore deo sentenciam recepture. Testes autem, qui fuerint nominati, si se gratia, odio, uel timore subtraxerint, per censuram ecclesiasticam, appellatione cessante, cogatis ueritati testimonium perhibere. Quod si non omnes hijs exequendis potueritis interesse, duo uestrum ea nichilominus exequantur. Datum laterani V. Idus Marcij, Pontificatus nostri Anno Quinto.
Tardior manus adiecit: Iste papa fuit 1214. - Bulla e filis cannabeis pendet. Orig. in Arch. Aerarii Reg. Hung. Acta Eccl. fasc. 25. Nro. 46. - Extr. Fejér Cod. dipl. III. I. 306., integre VII. V. 226.
Első
