771.
1272. 20. Maii. - Peturke haeredum solatio destitutus, terram suam in Epel Capitulo Strigon. donat, coram Conventu Cruciferorum Strigon.
Frater Elias, Magister Domus Hospitalis sancti Regis Stephani de Strigonio et totus Conuentus eiusdem domus, Omnibus xi. fidelibus, presentes litteras inspecturis, salutem in omnium saluatore. Ad vniuersorum noticiam tenore presencium uolumus peruenire, quod Petarke, filius Jardan de Epel, coram nobis personaliter constitutus, confessus est, quod cum ipse vnicum habuerit filium et idem in domini Regis et Regni seruicio, videlicet in exercitu, sit interemptus et nunc heredum careat solacio; ipse terram suam hereditariam, sufficientem ad vnum aratrum, uel circa hoc, quam habet in Epel, inter terram Capituli Strigon., pro remedio anime sue et predicti filij sui, in exercitu interempti, dederit, tradiderit et donauerit predicto Strigon. Capitulo cum omnibus vtilitatibus et pertinencijs suis perpetuo possidendam et specialiter dedit et donauit coram nobis et ipsum Strigon, Capitulum in eiusdem terre sue et ipsius utilitatum corporalem et pacificam possessionem in hominis nostri presencia introduxit. In cuius rei testimonium et memoriam, ad peticionem eiusdem Peturke, predicto Strigon. Capitulo super ipsa terra presentes nostras concessimus litteras, Sigilli nostri munimine roboratas. Datum tercio decimo kalendas Junij, anno domini Millesimo CCo. Septuagesimo secundo.
Sig. e zona membr. pendebat. Orig. in Arch. Cap. Strig. priv. Lad. 26. Fasc. 1. Nro. 9. - Ed. Cod. Strig. II. 105., Wenzel 1. c. VIII. 411.
772.
1272. 12. Jun. - „Magister Sixtus, Lector Strigon., iudex a domino nostro Stephano, illustri Rege Hungariae, super terris Udvarnicorum suorum per totum regnum suum pro tempore constitutus,” cum „pro exequendo mandato Regio in Comitatum vduornicorum de Sag” venisset, terram duorum aratrorum de villa Tukurch Alexandro et Chepano, filiis Laurentii, de genere Jak, contra Udvarnicos de villa Buruzd adiudicat. - Datum in die Pentecostes.
Wenzel 1. c. VIII. 399. - Extr. Kubinyi Cod. Dipl. Arpad. Pest 1867. 83., Fejér Cod. dipl. VII. IV. 263. - Occurrit porro eius, qua huiusmodi, a Stephano V. constituti, iudicia mentio a. 1273. et 1275. Wenzel 1. c. IV. 30., Fejér Cod. dipl. V. II. 276. et VII. II. 23.