IV.
DESIDERIUS VULGO DERSY.
Ca. 1067. usque circ. 1075.
Cuius antea Episcopatus Praesulem egerit, non liquet. Anno circ. 1064. in Ohronicis nostris sic celebratur: „Rex autem Salomon, tamquam novus et necdum in regno roboratus, timens ne forte Geysa cum exercitu Polonico super eum irrueret, paulisper retrocessit cum suis, et in castro Musun munitissimo tuta statione resedit. Porro Episcopi et alii viri religiosi instanter satagebant inter eos pacem componere, maxime autena Desiderius Episcopus delinitivis ammonitionibus et dulcibus allocutionibus suis mitigavit animum Geysae Ducis, ut Salomoni, quam vis iuniori, regnum cum pace redderet et ipse ducatum, quem pater eius prius habuerat, pacifice teneret, cuius salubribus persvasionibus Geysa, deposito rancore paruit.” (Marci Chron. pag. LVII. Thuróczi II. c. 47. Chron. Bud. 123.) De Desiderio hoc Katona (Hist. Eccl. Coloc. I. 159) haec observat: „Existimabam antea hunc Desiderium Jaurinensem episcopum fuisse; quum Turoczius eius sedem non exprimat et Jaurini pacem firmatam fuisse dicat. At Desiderium, nisi duo huius nominis Episcopi hoc seculo fuerint, Colocensem fuisse, regum diplomata docent.” Duos omnino huius nominis episcopos fuisse, Desideriumque hunc a Desiderio Colocensi distinguendum esse, Nro 24 docebimus. - Ut Archiepiscopus in litteris fundationalibus Abbatiae de Zazty ca. 1067. occurrit, in quibus testes fundationis nominantur: „Rex Salamon, Dux Magnus (Gyejcsa), Dux Ladizlaus, Archiepiscopus Dersy- - „(Wenzel I. 27). - Pray (Diatribe 66), Katona (Hist. Crit. II. 222. et Hist. Eccl. Coloc. I. 160), ac Fejér (VII. I. 120) Dersfy legerunt; sed nobis praeferenda videtur lectio Czechiana, quam Wenzel exhibet. - Pray (Hierarchia II. 4) in hoc Desiderium Episcopum Colocensem latere, et in Archiepiscopo mendum cubare existimat, sed coniecturam hanc refellit Katona (1. c.) et illum sedi Strigoniensi vindicat; erronee tamen a Desiderio, cuius nunc mentionem fecimus, distinguit, et Desiderium illum Colocensem fuisse Episcopum arbitratur. Fejér (VII. II. 264) Desiderium vulgo Derfi appellat, ac a. 1057-1067 Archiepiscopatui praefuisse dicit, sed non docet, neque docere potuit, cum usque a. 1067. ut Archiepiscopus nullibi compareat. Vitam, ut videbimus, ad a. usque 1074. produxit.
Első
