23.
1073. - Rex Salamon cum duce Gyejcsa in Insula Strigon. pacis negotia tractant.
Post haec collectis exercitibus, nunciis frequenter missis, tandem Rex et Dux venerunt Strigonium, ibique ex condicto utrique eorum tantum cum octo hominibus inter Episcopos et principes navigaverunt in insulam civitati proximam ad colloquendum, ubi diu semet ipsos incusantes et excusantes, tandem, roborato foedere pacis, Geysa rediit in Ducatum, Rex autem venit in Albam.
Marci Chron. p. LXV. - Thuróczi Chron. II. c. 52. - Katona Hist. Crit. II. 255.
24.
1074. 25. Dec. - Desiderius Archiepiscopus Gyejcsam Regem, ut Salamoni Regi reconcilietur regnumque ei restituat, gravissima exhortatione persvadet.
Rex autem Magnus (Gyejcsa) eo tempore natale Domini in Zugzard celebravit, quo petente Archiepiscopus Desiderius sollempnem missam celebravit et sermone lucidissimo animum Regis delinivit et ad bonum pacis inclinavit. Celebrataque missa, omnibus rite peractis, praecepit Rex, ut omnes egrederentur, praeter Episcopos et Abbates. Tunc Rex cum lacrimis prostratus est Archiepiscopo et aliis ecclesiasticis personis seu Praelatis. dicebat se peccasse, quia regnum legittime coronati Regis occupaverat, promisitque Regnum redditurum Salamoni, cum pace firma hoc modo: quod ipse coronam iure teneret, cum tertia tamen parte regni, quae ducatui appropriata erat, Salamon quoque duas partes Regni coronatus teneret, quas prius detinebat. Episcopi vero laetas Deo gratias egerunt, quia Regem spiritus sancti gratia, visitatione, conpunctum. et illustratum esse videbant. Tunc Rex Magnus missis nunciis ad Regem Salamonem, explicavit ei per litteras modum pacis praetaxatum. Incurrentibus itaque nunciis et super hac diversis diversa sentientibus, consummatio reconciliationis effectum sortiri non potuit.
Marci Chron. pag. LXXV. Thuróczi Chron. II. c. 55. Chron, Bud. pag. 159. - Bonfinius (Dec. II. 1. 4. pag. 223.) Desiderium hunc expresse Strigoniensem Metropolitam vocat, Pray autem (Annal. I. 77.) Colocensem Archiepiscopum asserit. Eidem sedi illum tribuit, ast cum titulo tantum episcopi, Katona (Hist. Crit. II. 374); ambo hi ideo, quia praenarrata a. 1076. evenisse putarunt: atque hinc Katona ita argumentatur: „Ex Geisae litteris, anno superiore (1075.) recitatis, constat, Nehemiam archiepiscopum Strigon. fuisse, quem titulum etiam anno sequente s. Gregorius eidem, ut videbimus, dedit. In iisdem Geisae litteris Desiderius Colocensis quidem, sed tantum Episcopus, dicitur, qui rursus

---