constantissime semper consilio illi et auxilio adfuit, nec in fidelitate ullo modo labefactari potuit; imo cum Carolum Martellum Neapoli per Legatum Papae coronatum esse inaudivisset, fertur in defensionem sui, Andreaeque Regis protulisse privilegium Pontificum, quo potestas coronandi Reges Hungariae Metropolitis Strigoniensibus est facta, adiecisseque, se neque Neapoli fuisse, neque ulli hominum facultatem dedisse inaugurandi Martellum in Regem Hungariae[271]. Quanta damna, persecutiones, imo proximum mortis periculum sustinuerit, ipse Rex et praecipue Regina gratanter agnoverunt, eiusque infinita merita altis laudum encomiis celebrarunt (Nri. 306. et 311.) Et digne omnino, nam Lodomerius ut amorem et fidelitatem suam seris etiam posteris manifestaret, "propter salutem temporalem et spiritualem excellentissimi domini nostri Andree, dei gracia Regni Hungarie Regis Illustris, altare in medio sancte Strigon. Ecclesie - - constructum - - in latere aquilonari" eiusdem ecclesiae "cum Capella decencius" construere intendebat, eamque decimis villae Maros dotavit (Nr. 405.)
Sed Lodomerius publicis licet curis, negotiisque nimium obrutus, non tamen officium supremi pastoris neglexit, imo reformando clero et restaurandae disciplinae ecclesiasticae intentus, frequentes synodos celebravit; sed unius solummodo hic vestigia perlustremus.
Anno 1292. 6. Maii Strigonii Concilium provinciale celebratum fuisse, Nrus 328. ostendit, nec aliud quid de concilio hoc adusque innotuit. Decreta quidem eiusdem nec nobis lustrare licuit; causam tamen servati Concilii et precipuam consultationis materiam fontes exteri nobis innuunt.
Anno 1291. "Emelich Alafar, filius Alfchir olim Soldani Egipti, partivit de Babilonia cum infinito exercitu militum et peditum et in obsidione civitatis Acconis die 5. Aprilis se posuit, quam per dies 44 machinis et sagittis die noctuque incessanter impugnando, in ore gladii violenter cepit die 18. Madii, quod quidem impossibile ab illis, qui eam viderant, credebatur. Nam erat ipsa civitas muris, turribus et foscis mirabilibus circumdata, homines etiam ad arma et pellegrini ultra 30000, milites boni 1200 et rex Cipri et ultra mulieres et parvuli 40000 et tamen per violentiam capta fuit. - - Mortui igitur fuerunt in captione dicte civitatis hominum et mulierum maxima multitudo, omnes etiam Templarii, - - et sic tota terra christianorum preter Ermeniam fuit amissa."[272] Nicolaus PP. IV. ad recuperandam terram sanctam a. 1291. 1. Aug. non tantum verbum crucis promulgavit[273]; sed "quia - ut Eberhardus Archidiaconus Ratisbon. dicit - multorum erat opinio, quod si fratres domorum ibidem, scilicet Hospitalis, Templi et Teutonicorum et reliquus populus

---

[271] Ganoczy Episcopi Varad. I. 129. Schmitth Archiep. Strigon. I. 149.

[272] Pertz Script. XVIII. 337.

[273] Theiner Monum. Poloniae I. 103.