Stephanum iuniorem Regem componit, ac iuramento Belae desuper praestito, interest.[335] Eodem anno iam aulae Regiae notarius familiaris vocatur et ab eodem Bela terram Castri Huntensis in villa Gyerk acquirit[336] 1264. Papa illum clericum Belae Regis appellat et beneficio illum provideri optat.[337] 1265. Bela ad salutandum neoelectum Papam eundem Ladislaum capellanum papalem, archidiaconum s. Eustachii in Ecclesia Strigon., familiarem notarium et apocrisiarium aulae regiae dirigit.[338] Anno 1274. Ladislaus Rex eidem Ladislao "archidiacono Huntensi, dilecto et fideli clerico nostro, propter commendabilem fidelitatem suam et meritoria obsequia, quibus coram nostris et predecessorum nostrorum, illustrium Regum Hungarie, oculis meruit multipliciter complacere, nostra eorumque negocia, inconcusse fidelitati sue commissa, tam in Hungaria, quam in Romana et multorum Regum curia laudabiliter promouendo" terras udvarnicorum in Gyerk confert.[339] Ab a. 1275. mense circ. Oct. Praepositus Strigon.[340], anno 1277. "volens pocius sub timore mortis viuere, quam sub spe vite mori," notabile testamentum condit, quo se Capitulo Strigon. et aliis ecclesiis nimis beneficum exhibet.[341] Eodem anno Ladislaus Rex merita eius denuo encomiis celebrat et remuneratur.[342] Jam quis tali viro ea, quae Chronicon Salisburgense narrat, appingere audeat? Sed illum nec valde familiarem Nicolao fuisse, inde apparet, quia dum Ugrinus pro excessibus Nicolai palatium illud Strigoniense Capitulo Strigon. cessit, Ladislaus hic procuratorem Capituli egit.[343] Non ergo Ladislaus hic cum Rege et Electo Strigon. ad Cumanos recessit, nec gladio confossus fuit. Sed occurrit eodem adhuc anno 1279. ergo post fata Ladislai huius, Gregorius Praepositus Strigon., cuius memoriam unicum solum Capituli Strigon. diploma conservavit[344], quique ultra annum hunc vitam non produxisse videtur, anno enim 1280. 19. Aug. iam Lucas Praepositus Strigon. occurrit.[345] Hic ergo Electi socius infelix fuerit.
His ergo omnibus combinatis et praecipue vitae Nicolai cursu considerato, tragoedia a chronista enarrata, nimiopere verisimilis apparet. Una tamen difficultas adhuc superanda venit. Tragoedia nempe haec iuxta praeallata

---

[335] Vide Tom. I. 477. 481.

[336] Ibidem 491.

[337] Ibidem 498.

[338] Ibidem 520.

[339] Vide Nrum. 19.

[340] Vide Nrum. 37.

[341] Vide Nrum. 54.

[342] Vide Nrum. 57.

[343] Vide Nrum. 77.

[344] Vide Nrum. 90.

[345] Fejér Cod. dipl. V. III. 38. 48.