442.
.... 16. Jul. - Lodomerius Archiepiscopus Strigon. Comitem Herbordum de genere Osl ab usurpanda vicesima decimarum Comitatus Soproniensis, Abbatiae de Kedhely collata, paternis monitis dehortatur.
Lodomerius, miseracione diuina archiepiscopus Strigon., locique eiusdem comes perpetuus, nobili viro et amico speciali, comiti Herbordo, de genere Osl, salutem cum benediccione paterna. Frater G. abbas Monasterij sancte Marie de Kedhel et conuentus eiusdem loci, Cysterciensis ordinis, nobis exposuerunt conquerendo, quod vicesimam decimarum Supruniensis comitatus, ex collacione Regis Stephani eis traditam in perpetuam elemosinam, nititur vestra nobilitas et intendit contra iusticie Regulam occupare. Vnde cum ex intime dileccionis affectu vos corporaliter diligamus, maiori tamen et propensiori cura tenemur circa spiritualia et que ad spiritualia faciunt, vos fouere, ab hijs, que periculum anime pariunt, paternalibus studijs vestrum animum, quantum in nobis est, spiritualiter ammonendo. Decime quippe, oblaciones et primicie in solis bonis ecclesiarum computantur et a laicis possideri penitus prohibentur, iuxta sancciones canonum paternorum. Nec vicesima decimarum a maiestate Regia transferri potest in personam aliqualiter laicalem, quia nec ipsa celsitudo Regia possidere potest aliquam particulam decimarum, nisi in ecclesias, uel alia monasteria transfundendo; nobilitatem vestram attencius requirentes et vobis in salutem anime consulentes, quatenus a detencione, uel occupacione ipsius vicesime decimalis desistere velitis omnino, filialem et spiritualem obedienciam paternalibus monitis exhibendo. Cum enim decima, pars dominica censeatur et ob cultum diuini nominis psallentibus in ecclesia debeatur; iudicium sibi manducat et sumit, quicumque ausu sacrilego extra sacrum ordinem hoc sibi presumpserit temerarie uendicare. Datum Strigonij in crastino festiuitatis Diuisionis apostolorum.
In parte aversa: Nobili viro, comiti Herbordo de genere Osl. - Sigillum ext. margini fuit appressum. Orig. in Arch. Aerarii Reg. Acta Eccl. fasc. 28. Nr. 58. - Ed. Fejér Cod. dipl. VII. II. 79.
443.
.... 18. Aug. - Lodomerius Archiepiscopus Strigon. magistrum Joannem filium Henrici Bani ad restituendam Abbati de Bakonybél villam Várasnyul et tributum provocat.
Magnifico viro, Amico suo karissimo, magistro Johanni, filio Herrici Bani, Lodomerius miseracione diuina Archiepiscopus Strigon., eiusdemque loci Comes perpetuus, sincere amicicie firmitatem. Cum non sit dubium, Detentores

---