eorum hereditarium, sub metis et terminis antiquis, prout per magistros Gregorium et Georgium dicta piscina habita extitit et possessa ab antiquo."[437] Piscina haec Lugur in literis Belae IV. Regis a. 1268. salix, rectius salictum seu, ut diplomata nostra passim habent, salicetum, vocatur et in viciniam villae Guta locatur, ac iam tunc a supradicto Chene cum aliis circumiacentibus terris possessam fuisse, his verbis perhibetur: "Inde vadit ad locum, qui dicitur Magla, qui pertinet ad villam Bogha, ex altera parte dicti loci est terra Chene, de genere Kathpan, deinde revertitur ad piscinam communem, que Semlekus appellatur; postea venit ad aliam piscinam Labuantow nominatam, cuius pars vna pertinet ad predictam villam Bogha, altera vero spectat ad villam Guta, que est archiepiscopi Strigon.; deinde venit contra orientem ad salicem Lugur, ubi est meta communis, abhinc transit aquam dudnag, cuius aque superior pars est predicte ville Bogha, inferior autem Chene supradicti. Item mete ville Zakalus - - - pertinentis ad Camarun, primus commetaneus est Chena (sic) de genere Kathpan, solummodo in terra, in aqua vero nullam habet porcionem."[438]
Kathpanorum genus late per Comitatum Comaromiensem floruit; in literis enim Belae Regis nunc adductis praeter Comitem Chene, occurrunt Balyan alias Barianus vel Balyanus, tum Georgius, Janus et Paulinus, qui circa villam Szakálos et Arpa terras possidebant, circa villam Olgya vero Castri Comaromiensis commetanei erant nobiles de Kathpan.[439] Porro in literis a. 1295. Capituli Strigon. mentio iniicitur dominae Aglenth relictae Joannis filii Nicolai de genere Kathpan, et Nicolai adolescentis, filii eiusdem[440], avus autem huius Nicolai certocertius fuit Nicolaus Comes, filius Joannis de genere Catpan, qui a. 1259. in literis Capituli Strigon. Abbatiae de Catpan, patronus legitur.[441] Apparet una hinc, Abbatiam de Katpan, tardius Koppan[442], quae iam in literis Belae Regis praecitatis[443] et in charta mox adducenda occurrit, nomen a suo fundatore traxisse, adeoque eam a stirpe Katpanorum fundatam esse. Porro Nicolaus hic Comes cum aliis cognatis suis, passim iam adductis, in charta quadam sic recensetur: "Hec sunt nomina testium Thome et Baliani, quos produxerunt ... contra

---

[437] Wenzel Cod. Arp. V. 168. et extr. Magyar Tört. Tár. IX. 111.

[438] Mon. Strigon. I. 555.

[439] Ibidem pag. 553., 554., 558., 559.

[440] Fejér Cod. dipl. VII. III. 111.

[441] Czinár Monast. II. 232. - Cum hic etiam ad literas Capituli Strigon. fiat provocatio, non vana nobis suspitio occurrit, literas has de a. 1295. et 1259. productas unas easdemque esse, adeoque etiam sub duobus his Nicolais eandem personam latere.

[442] Fejér Cod. dipl. VII. III. 79.

[443] Mon. Strigon. I. 552., 553.