Theodorus Jauriensis, Antonius Chanadiensis, Michael Zagrabiensis, Emericus Varadiensis et Nicolaus Bosnensis Episcopi, tum Paulus Praepositus Colocensis; adminus 14. Nov. Budae coram Legato congregati fuerant[502]; sed Gregorius huic Concilio vix interfuit, Budae enim tunc Venceslaus residebat, imo Legatus ipse paulo post recedere debuit, nam cum in urbe hac constitutus, minus caute "promotioni domini Karoli, pro qua directus fuerat, intenderet; fautores filii Regis Bohemiae id aegre ferentes, laesioni illius intendebant. Territus itaque Legatus metu, clanculo Budenses deseruit et properanter Posonium festinavit,"[503] ubi illum iam 24. Jan. 1302. resedisse, Nri. 535. 536. docent, atque hic longiorem moram trahens (Nr. 544.) Praelatos, quibuscum iam vi officii sui in continuo nexu permansit, sensim ad partes Caroli deflexit. Sic a. 1302. 10. Sept. penes Gregorium nostrum Stephanum Colocensem Electum, Michaelem Zagrabiensem, Paulum Quinqueecclesiensem et Nicolaum Bosnensem Episcopos in Castris Caroli invenimus (Nr. 552.) Factio Caroli sic de die in diem excrescens, anno hoc 1302. ad oppugnandum Budae Venceslaum et capiendam Albam Regalem animum adiecit, prout anno eodem ipse Venceslaus haec ita perhibet: "consideratis - - seruicijs magistri Mathey et Oliverij filij Bethlem, una cum fratribus ipsorum, seruiencium magistri Dominici, filij Comitis Stephani de genere Ratolth, que nobis - - inpenderunt, maxime tunc, cum infideles Barones nostri, seu inimici capitales, contra nostre maiestatis personam Budam uenissent, vastus, spolia, incendia, cedes et extirpaciones uinearum ac alia diuersa nocumenta Budae et circa Budam in preiudicium nostri Regiminis et honoris committere non formidantes, ijdem nobiles - - cum alijs nostris fidelibus - - viriliter dimicarunt. - - Ceterum cum Rolandus, filius Rolandi, gener Stephani filij Marcy infidelis nostri, cum suis complicibus seu malefactoribus ad spoliandum et devastandum Comitatum Albensem venisset, ijdem nobiles cum alijs comprouincialibus suis - - cum eisdem conflictum habuissent, deo propicio victoriam laudabilem sunt adepti."[504] Hac occasione civitatem Budensem, vel adminus partem eius occupatam fuisse, idem Venceslaus a. 1303. his testatur: "eo tempore, quo Carolus erectis vexillis infidelium nostrorum contra nos processit et nobis Budae existentibus ipsam civitatem circumvallatam destruere nitebatur; ubi quidem filii Jacobi de Cheznek in societate Stephani filij Marci, infidelis nostri, cognati eorum, procedendo, in eadem civitate multa incendia, multasque destructiones commiserunt, homicidia innumerabilia perpetrantes, complures etiam ad nos pertinentes membris mutilarunt in nostri nominis praeiudicium et gravamen, pro quibus quidem suis excessibus ne dum possessionibus spoliari, verum
[502] Fejér Cod. dipl. VIII. VII. 25.
[503] Chron. Austr. Pez Script. I. 724.
[504] Nagy Cod. Andeg. I. 42. et Fejér Cod. dipl. VIII. I. 92.
Első
