etiam capitibus eorum truncari debuerunt."[505] Oppugnationi huic praeter Carolum etiam Gregorium cum Episcopis nunc adductis interfuisse, literae ipsius Gregorii 10. Sept. prope veterem Budam datae ostendunt (Nr. 552.) e quibus etiam tempus oppugnationis apparet, nam Gregorius nisi durante hac oppugnatione prope Budam comparere potuit. Venceslaus victoriam quidem reportavit; sed a suis magis ac magis derelictus, praecipue a prolata a. 1303. 31. Maii Bonifacii Papae sententia, qua Regnum Hungariae Carolo adiudicavit[506], vix aegre semet servare valebat, Regnumque tandem Carolo, ut videbimus, cedere debuit.
Sed qualem iam factorum suorum Gregorius mercedem reportavit?
Strigonium, metropolis ecclesiae Hungariae ob odium praeprimis, quo Barones passim in Gregorium ferebantur, expugnatum, per Bohemos dein detentum, quorum Castellanus Sdyzlaus, bona universa etiam Capituli occupavit. (Nr. 562.) Et generatim Praelatis a Gregorio et Legato sensim ad partes Caroli deductis, omnes ecclesiae ad incitas redactae fuerant: "Conqueruntur excellencie vestre - scribit episcopus quidam a. 1303. ad Albertum Regem Romanorum - omnium ecclesiarum prelati regni Hungarie, qui vt ita dicam, in merore et tristicia positi, in opprobrium ordinis clericalis coguntur mendicare. Corona enim ecclesiarum, predia et facultates per maleficos et latrones quasi indistincte sunt occupate. Super quibus - - imploramus, quatenus ecclesiam dei subiectam iugo pharaonice seruitutis eripere laboretis; nos enim prelati ecclesiarum huius regni in hoc statu, in quo sumus, nec vivere cupimus, nec mori recusamus."[507] Haec omnia Gregorius avertere, vel adminus furorem adversantium temperare potuisset, si semet vivente Andrea Rege in officio continuisset; sed defectione sua et immoderata agendi ratione partem adversam exacerbavit, imo suae etiam factionis asseclas et praecipue Regni Praelatos ita a se abalienavit, ut Legatus a. 1301. ante 8. Nov. haec Bonifacio Papae de illo scripserit: "quod Prelati Regni Ungarie quasi omnes communiter Strigoniensi adversabantur Electo - - quodque in ipso Regno vox erat et fama communis, quod si Strigoniensis et Colocensis (mortuo nempe iam Joanne Archiepiscopo) ecclesie forent melius ordinate, ac de personis idoneis eis esset bene provisum, Regnum prefatum, cuius status et conditio ab ecclesiis ipsis noscuntur plurimum dependere, posset melius et facilius reformari." Papam praevie iam informatum eatenus fuisse, responsum eius, Legato 8. Nov. submissum docet, quo illi prohibet, "sicut ante recessum tuum a nobis te duximus presentialiter informandum," ne semet negotio Electi Strigoniensis immisceat. Et licet Electum hunc praecipuum causae Caroli

---

[505] Fejér Cod. dipl. VIII. I. 116. et XI. 421.

[506] Theiner Mon. Hung. I. 397.

[507] Fejér 1. c. VIII. VII. 375.