573.
1303. 18. Nov. - Lodomerius Archiepiscopus Strigon. Jobagiones ecclesiae suae de Fegyvernek et Zamla quoad metas concordasse testatur.
A. B. C.
Nos Lodomerius dei et apostolica gracia Archiepiscopus que eiusdem Comes perpetuus, significamus quibus expedit, presencium per tenorem, Quod Comes Dyonisius, frater Leuas de Fegyvernek, ab vna, Gregorius uero et Petrus filij Bokxa de Zamla, Jobagiones Ecclesie nostre antedicte, parte ab altera, Coram nobis personaliter constitutis, propositum extitit per eosdem, quod cum super metis et terminibus (sic) Possessionum Ipsorum Zamla et Fegyuernek vocatarum in presencia nostri Palatini mota fuisset materia questionis inter ipsos et diucius ventilata; tandem per reformacionem proborum virorum ad plenum concordassent et eorum possessiones, superius nominatas, per limitaciones metarum infra designatarum ab invicem segregando, taliter diuisissent, ac per cursus metarum sic collocassent: Prima meta, vt partes retulerunt, est locata aque Compa, parte ex altera uersus Orientem in loco vadi eiusdem Compa infra molendinum Gregorij et Petri supradictorum; abinde egrediens contra Orientem directe venit in capud vnius friuuli, Hynta vocate, ibidem est locata meta terrea; inde paululum procedendo, cadit in viam, qua itur uersus Fegyuernek et per superiorem partem eiusdem vie directe ad orientem currendo, cadit in aquam Perech vocatam. Ibi posuerunt vnam metam terream et sic finirentur. Sic tamen, vt quidquid a plaga Septemtrionali metarum iam designatarum fore dinoscitur, in Ius et proprietatem Gregorio et Petro de Zamla cessit possidenda; quidquid vero a plaga meridiana esse dinoscitur cursuum predictarum metarum, cessit in Ius et proprietatem Comiti Dyonisio de Fegyuernek in heredum successores irreuocabiliter possidendam. Tali vinculo interiecto, quod si processu temporum cuiuscumque parcium successores hanc diuisionem cassare niterentur; extunc parti, in eadem perseueranti diuisione, absque porcione Iudicis, in Sex marcis ante litis ingressum conuinceretur eo facto. In cuius rey testimonium presentes concessimus, Sigillo nostro munimine roboratas. Datum in octauis beati Martini, Anno domini M°. CCCmo. tercio.
Sigillum minus bene conservatum e rubro et viridi serico pendet. Orig. in Archivo Aerarii Reg. Hung. Acta Neo Reg. fasc. 935. Nro. 8. - Ed. Nagy Cod. Andegav. I. 65. - Diploma hoc in Dato depravatum esse, iam pag. 432. observavimus.
Első
