litteras inspecturis, salutem in omnium saluatore. Regie sublimitatis celsitudo, que in omnium oculis tamquam speculum collocatur, tanto salubrius Regno prouidet et Corone, quanto suorum subditorum fidelitatibus sue liberalitatis et prouisionis munificenciam porrigit largiorem. Dum enim donis Regie largitatis pociuntur, dum dignis premijs confouentur, Thronus Regalis excellencie solidatur et ipsorum exemplo reliqui ad fidelitatis studia forcius accenduntur. Proinde ad vniuersorum noticiam presencium, pariterque futurorum, Harum serie volumus peruenire, Quod nos consideratis fidelitatibus et seruiciorum meritis nobilis viri, Johannis, dicti Finthur, filij Thome de Lad, de Comitatu Bachiensi, que nobis in diuersis nostris expedicionibus et agendis fideliter et indefesse exhibuit et inpendit, volentes ipsius obsequijs meritorijs Regie remuneracionis et gracie occurrere cum fauore, quandam possessionem quondam Johannis Bani, filij Joance, auunculi Johannis prenotati, Sap uocatam, in eodem Comitatu existentem, titulo Regie collacionis et empcionis ab eodem Johanne Bano, sine herede decedente, olym habitam et possessam, ac iuxta antiquam et approbatam Regni nostri consuetudinem in nostras Regias manus deuolutam, de consilio Prelatorum et Baronum Regni nostri, ac plenitudine nostre Regie gracie, qua ex officio susscepti regiminis digna meritis singulorum premia recompensare debemus, prefato Johanni, dicto Finthur, et suis heredibus, heredumque successoribus, tum propter consanguineitatis proximitatem, tum eciam propter fidelitatum et obsequiorum eiusdem prerogatiuam, ac sanguinis sui effusionem, qua per nostros infideles pro fidelitate, nobis exhibenda, extitit rubricatus, cum suis utilitatibus et pertinencijs vniuersis, sub eisdem metis et terminis, quibus per Johannem Banum antedictum Auunculum suum habita fuit et possessa, dedimus, donauimus et contulimus, perpetuo et irreuocabiliter possidendam, habendam et tenendam. Vt autem huius nostre collacionis et donacionis series robur optineat perpetue firmitatis, nec lapsu temporis per quempiam ualeat retractari; sepedicto Johanni, dicto Finthur et suis heredibus presentes concessimus litteras, nostri duplicis sigilli munimine roboratas. Datum per manus reuerendi viri, magistri Johannis, albensis ecclesie Electi, Aule nostre vicecancellarij, dilecti et fidelis nostri. Anno ab incarnacione Domini Millesimo CCC°. octauo. XII°. kalendas Aprilis. Indiccione Sexta.
Sigillum e rubro et fusco serico pendebat. Orig. in Arch. Prim. Sec. Lad. T. fasc. 1. Nr. 11.