computando, plenarie persoluisset et sic sepedictus Gregorius et sui successores de morte sepedicta essent expediti et omnino absoluti; obligando se idem Nicolaus, quod quicunque processu temporum sepedictum Gregorium, uel suos successores racione sepedicte mortis forsitan uellent inpetere, uel molestare: extunc ipse et fratris sui, ac eorum successores tenebuntur expedire proprijs laboribus et expensis. In cuius rei testimonium presentes concessimus litteras, sigilli nostri munimine roboratas. Datum in ffesto beate Marie magdalene, Anno domini M°. C°C°C°. Nono.
Sigillum e rubro serico pendet. Orig. evanidum in Arch. Cap. Poson. publ. Capsa 14. fasc. 22. Nr. 5.
669.
1309. 17. Aug. - Capitulum Strigon. fundum Curiae in Civitate Tirnaviensi Rumhardo civi elocat.
Theophilus prepositus et Capitulum ecclesie Strigon., vniuersis, presentes litteras inspecturis, salutem in domino sempiternam. Ad vniuersorum noticiam harum serie uolumus peruenire, Quod nos aream seu fundum curie nostre, in ciuitate Tirnensi constitutum, Rumhardo Ciui de eadem, cum libertate decem annorum in filios filiorum ipsius dedimus et locauimus perpetuo possidendum, tali modo, quod elapsis ipsis decem annis, idem Rumhardus et deinceps sui posteri, ac omnes alij, quibus ipse fundus quouis tytulo locabitur, seu remanebit per eundem, racione pensionis dicti fundi nostri, unam marcam puri et fini argenti, siue duodecim pensas latorum viennensium, pro eodem annis singulis in festo beati Jacobi apostoli (25. Jul.) ad plenum dare et soluere nobis tenebuntur, omni honere, seruicioque ciuitatis incluso et super se assumpmendo; et si dictus Rumhardus supradictum fundum nostrum per modum uendicionis, locacionis, seu legacionis a se uoluerit alienare; nobis requisitis et de nostra conniuencia, cuicunque, uel quibuscunque uolet, poterit alienare modo supradicto. Si eciam terminis solucionis aduenientibus, pensionem pretactam sepefatus Rumhardus omitteret in soluendo, ut assumpsit, obligauit se ad iura communia et grauamina ciuitatis prenotate. Ceterum idem Rumhardus assumpsit tam ex parte sua, quam aliorum, dictum fundum possidencium, quod quandocunque de nobis accesserint aliqui in Tyrnauiam, eosdem ad suam domum, que in predicto fundo extiterit, tanquam dominos terre, honeste suscipere, ac eciam frugibus nostris annis singulis tempore messis hospicium dare absque omni refragacione tenebuntur; prout ad hec omnia et singula premissorum mediantibus litteris predicte Tyrnensis ciuitatis, per ipsum Rumhardum exinde nobis datis, idem firmiter obligauit se facturum.