aut alicuius premij sperandi persecutoribus Ecclesiarum adheserint et eis consilium, auxilium, vel fauorem praestiterint clam, vel palam; eos, aut eum eo facto reputamus et Judicamus periuros et infames, et scribemus contra eos Sedi Apostolicae, sicut de hoc Jurauimus, vt depositionis et degradationis poenam, ad quam nos sponte in alterutrum propter tuendam publicam regni et Regnicolarum, ac omnium Ecclesiarum Justiciam et libertatem obligauimus, incurrant, A domino Apostolico ezdem imponendam, si hoc nobis certo Indicto (sic) constiterit, velut contra pacis et concordiae turbatores. Inferiores quidem Statu episcopalis dignitatis, qui ad detrimentum Ecclesiasticae libertatis talibus persecutoribus adheserint et eis obsequia, consilia prodicionis dare inuenti fuerint; secundum constitutionem domini quondam fratris Generalis[619] Legati ipsos incurrere volumus Excommunicationis Sententiam ipso facto, Et Insuper poenam priuationis incurrant perpetuo et priuilegio Clericali spoliatus censeatur, ipsius beneficium, ad quem pertinet collatio, libere, tamquam de iure et de facto vacans, conferat Idoneae personae, quae commode poterit Ecclesiae deseruire ad profectum.
Reliqua desunt. A tergo legitur: Juramentum Episcoporum regni Hungariae cum Archiepiscopis, ut conseruentur in suis libertatibus. - E Codice Mss. Nicolai Oláhi et Antonii Verantii Archiepiscoporum Strigon. sec. 16. In Arch. Primat. Sec. Protocollum A. pag. 232. - Ed. Fejér Cod. dipl. VIII. II. 144., qui Synodum tunc Colocae celebratam putat; non tamen veri nominis synodum fuisse, Ladislaus Archiepiscopus Colocensis, his verbis, a. 1318. 22. Mart. ad Benedictum Episcopum Transilvanum directis, docet: "Noueritis, quod Dominus Ladislaus Quinqueecclesiensis et Iwanka Waradiensis Ecclesiarum Episcopi, nuncii nostri et omnium Episcoporum, qui congregationi in Ecclesia Colocensi interfuerunt--a Domino rege sunt reuersi." (Ib. 168.) Ex his una tempus asservatae Congregationis elucet, quod adhuc propius determinant literae Joannis Episcopi Nitriensis, Colocae 3. Martii editae, quibus Mathaeum Palatinum et complices ob illata damna excommunicat, quas eosdem die transscribunt ibidem et approbant Ladislaus Colocensis Archiepiscopus, Benedictus Chanadiensis, Benedictus Transilvanus, Georgius Sirmiensis, Ladislaus Quinqueecclesiensis, Nicolaus Jauriensis et Iwanka Varadiensis Episcopi. (Ib. 169.) Ergo die 3. Mart. Thomas Archiepiscopus Strigon. et plures Episcopi Coloca iam discesserunt, sicque congregatio haec exeunte Februario asservata fuit E literis Joannis Episcopi Nitriensis discimus, Mathaeum Palatinum etiam per Thomam Archiepiscopum, "ac alios Episcopos de Regno Hungarie," probabilius in ipsa hac congregatione excommunicatum fuisse; item quod Magister Dominicus quidam dederit "obsides Domino nostro Archiepiscopo" pro parte, ut videtur, Episcopi Nitriensis; demum quod quidam Comes Abraham duas possessiones dederit Ecclesiae Nitriensi, approbante eodem Thoma Archiepiscopo.

[619] Scriba hic certe aberravit, nomen Gentilis inepte depravando.