Ladislao preposito sancti Thome, Nicolao Posoniensi preposito, Petro Sancti Georgii, Renaldo custode existentibus.
E transsumpto exesi Demetrii cardinalis, archiepiscopi Strigon. (1379 – 1387). – Orig. membr., cum sigillo e rubro et viridi serico pendenti integro, in Arch. Cap. Strig. Priv. Lad. 49. fasc. 1. nr. 12.

137.
1326. Pozsony. 20. Junii. – Frater Sygo de Portatriona, praeceptor et magister domorum s. Antonii per totam Hungariam et Sclavoniam, venditionem terrae domus Posoniensis, per Pontium abbatem dominae Margarethae, relictae comitis Jacobi factam, corroborat.
Edid. Fejér: Cod. Dipl. VIII/3. p. 146.

138.
1326. Roma. 22. Junii. – Stephanus, episcopus Verinensis, visitantibus ecclesiam Posoniensem certis festivitatibus, 40 dierum indulgentias concedit.
Universis Christi fidelibus, presentes litteras inspecturis, frater Stephanus, Dei gracia Veriensis episcopus, salutem in Domino sempiternam. Quoniam, ut ait apostolus, omnes stabimus ante tribunal Christi recepturi, prout in corpore gessimus, sive bonum fuerit, sive malum, oportet nos diem messionis extreme misericordie operibus prevenire, ac eternorum intuitu seminare in terris, quod reddente Domino, cum multiplicato fructu recolligere valeamus in celis, firmam spem fiduciamque tenentes, quoniam qui parce seminat, parce et metet et qui seminat in benediccionibus, de benediccionibus et metet vitam eternam. Cum igitur ex parte Alhaidis de Presburga, nobis fuerit supplicatum, ut omnibus venientibus ad ecclesiam sancti Martini episcopi in Prespurga, Strigoniensis dyocesis, velimus indulgenciam exhibere; nos vero, de omnipotentis Dei misericordia et beatorum Petri et Pauli apostolorum eius auctoritate confisi, omnibus vere penitentibus et confessis, qui vel que, predictam visitaverint ecclesiam in ipsius festivitatibus: seu eciam Nativitatis Domini, Circumcisionis, Epiphanie, Resurreccionis, Ascensionis, Pentecostes, Trinitatis, nec non in sollempnitatibus Beate Marie Virginis, sanctorum Petri et Pauli apostolorum, aliorumque apostolorum et evangelistarum, sancti Johannis Baptiste, sancti Nicolai, sancti Martini, sancti Laurencii, sancti Stephani, sancti Michaelis archangeli, sancte Katerine, sancte Marie Magdalene, sancte Elysabet, sancte Margarete, in festo Corporis Christi, in dedicacione ecclesie et in dominicis diebus in quadragesima, in die Omnium Sanctorum et in die animarum, ac per eorum octavas, manusque porrexerint adiutrices ad fabricam, luminaria, seu ornamenta ecclesie supradicte; vel qui Corpus Christi secuti fuerint cum portatur infirmis, vel in serotina pulsacione ter Ave Maria dixerint: XL dies, de iniunctis eis penitenciis, misericorditer in Domino relaxamus, dummodo dyocesanus prestet assensum. In cuius rei testimonium presentes litteras fieri fecimus nostri sigilli appensione munitas. Datum Rome, anno domini M CCC XXVI. mensis iunii die XXII., pontificatus domini Johannis pape XXII. anno eius decimo.
Fragmen sigilli ovalis, rubrae cerae, e zona pendet. – Orig. membr. pulchre exaratum, in Arch. Cap. Pos. Priv. Capsa J. fasc. 1. nr. 3.