852.
1347. Buda. 1. Decemb. – Chanadinus, archiepiscopus Strigoniensis, causam inter Joannem electum Vesprimiensem, et rectores ecclesiarum de Örs et Sasad exortam, ad novum terminum prorogat.
Nos Chanadinus, Dei et apostolica gracia archiepiscopus Strigoniensis, locique eiusdem comes perpetuus, damus pro memoria, quod causam, quam reverendus vir dominus Johannes, electus confirmatus ecclesie Wesprimiensis, aule regine cancellarius, in iure canonico licenciatus, comes capelle, secretariusque cancellarius domini Lodouci, eadem gracia regis Hungarie, pro quo discreti viri Andreas, prepositus de Posoga, et Blasius archidiaconus, vicecomes capelle, cum procuratoriis litteris eiusdem astiterunt, contra Mychaem de Wrs et Benedictum de Sasad, ecclesiarum rectores, iuxta continenciam litterarum nostrarum prorogatoriarum, in quindenis festi beati Martini confessoris movere habebat coram nobis, ob regium preceptum, simili modo ad quindenas predicti festi beati Martini confessoris proxime affuturis[671], duximus prorogandam. Datum Bude, septimo die termini prenotati, anno Domini M-o CCC-o XL-mo septimo.
Extus: Pro honorabili viro domino Johanne, electo confirmato ecclesie Wesprimiensis, contra discretos viro (sic!) Mychaelem de Wrs et Benedictum de Sasad ecclesiarum plebanos ad quindenas festi beati Martini confessoris (expunct.: p) nunc affuturas prorogatoria. – Orig. chart., in Arch. Cap. Vespr. Epp. Miscellanea nro 124. Lad. 86. – Sigillum tergo fuit appressum.

853.
1347. (Veszprém.) 2. Dec. – Capitulum Vesprimiense, literas Ladislai IV. regis, super modo exactionis tributi, capitulo Strigoniensi in transsumpto concessisse, Ludovico I. regi rescribit.
Nos Johannes prepositus et capitulum ecclesie Wesprimiensis, omnibus Christi fidelibus, tam presentibus quam futuris, presencium noticiam habituris, salutem in Domino. Et moralitas hoc exigit, et nature racio expostulat, ut mandata principum execucioni mandentur, presertim cum ea iusticiam nutriant et faveant equitatem. Sane ad universorum noticiam harum serie volumus pervenire, quod ex parte honorabilium virorum capituli sancte Strigoniensis ecclesie, quedam littere serenissimi principis domini Lodouici, Dei gracia illustris regis Hungarie, nobis fuerunt presentate hunc tenorem continentes:
Lodouicus, Dei gracia rex Hungarie, fidelibus suis capitulo Wesprimiensi, salutem et graciam. Dicit nobis discretus vir, magister Ladizlaus prepositus ecclesie sancti Georgii de suburbio Strigoniensi, in sua et honorabilium virorum capituli ecclesie Strigoniensis concanonicorum suorum personis, quod privilegia et litteralia munimenta ipsorum, super facto limitacionis et ordinacione, seu serie exaccionis decimarum ipsis provenire debencium, olym per pios predecessores nostros beate recordacionis reges Hungarie illustres facte et ordinate, confecta et emanata, casualiter ab ipsis alienata extitissent, quorum series et continencias, instrumenta et litteralia munimenta vestra transscriptoria, super facto limitacionis et ordinacione exaccionis decimarum vestrarum confecta, in conservatorio ecclesie vestre reposita et habita seriatim suo modo continerent; quorum continencie

[671] 1347. 25. Nov.