972.
1329. Avignon. 27. Jan. – Oliverius de Cerreto, canonicus Pictaviensis, capellanus papalis et sacri palatii causarum primi gradus auditor, cruciferos de Strigonio, contra Henricum episcopum et capitulum Vesprim., ratione decimarum et quartarum de Calidis Aquis, de Táth et aliis, citari iubet.
Edid. Monum. Rom. Eppatus Vesprim T. II. p. 49. et sq.

973.
1329. (Esztergom.) 14. Aug. – Strigoniense capitulum, cruciferos de Strigonio, contra Henricum episcopum et capit. Vespr., ratione decimarum et quartarum lite agitatarum, citasse, perhibet.
Edid. Monum Rom. Eppat. Vesprim. T. I. p. 320. et sq.

974.
1329. Visegrád. 19. Aug. – Benedictus episcopus Chanadiensis, Henricum episcopum et capitulum Vesprimiense, ac Cruciferos de Strigonio, super decimis et quartis in Calidis Aquis, in Tát, Béllye, Zsidód et S. Andrea, in pacis unionem devenisse, testatur.
Nos Benedictus, Dei gracia episcopus Chanadiensis, memorie commendantes significamus, quibus expedit tenore presencium universis, quod venerabili in Christo patre domino Herrico, eadem gracia episcopo Wesprimiensi, aule domine regine cancellario et magistro Johanne preposito eiusdem loci, pro se et pro capitulo Wesprimiensis ecclesie ab una parte; religioso et Deo amabili viro fratre Jacobo magistro cruciferorum domus hospitalis sancti regis Stephani de Strigonio, pro se et pro toto conventu loci eiusdem ab altera; in nostri presencia personaliter constitutis, propositum et relatum extitit per eosdem: quod cum inter ipsum venerabilem patrem dominum episcopum, prepositum et capitulum dicte Wesprimiensis ecclesie et inter eosdem magistrum Jacobum et conventum cruciferorum, super decimacione de Calidis Aquis et super quibusdam ecclesiis, videlicet beate Margarethe de Bylie, sancti Georgii de That, sancti Thome de Sydoud et sancti Andree circa eandem villam sancti regis Stephani quondam existencium, iam diruta et destructa; et super totali decimacione et quartis earundem ecclesiarum mota fuisset materia questionis et tam in curia Romana, quam in presencia iudicum delegatorum ipsa causa inter partes fuisset diucius ventillata, tandem eedem partes iuxta nostram et aliorum proborum et discretorum virorum, quorum arbitro seu composicioni se compromiserant, in talem pacis et concordie devenerint unionem: quod predictam decimacionem, super Calidas Aquas existentem, quam usquemodo idem magister et conventus cruciferorum tenuit et possedit, in duas partes equaliter dividere tenebuntur, quarum una pars scilicet a parte magne decimacionis Budensis, ad ipsum dominum episcopum et suos fratres pertinentis, in usum ipsius domini episcopi Wesprimiensis; quarta vero eiusdem medietatis eidem capitulo cum omnibus suis utilitatibus cedet iure perpetuo possidenda; residua vero medietate eiusdem decimacionis in partem dicti magistri et conventus cruciferorum similiter cum suis utilitatibus perpetuo remanente. Ceterum ecclesia sancti Georgii de Thaat, cum omnibus decimis in parrochya eiusdem ecclesie existentibus et spirituali iurisdiccione

---